दौंड तालुक्यात लोकशाहीची थट्टा: बिरोबावाडीच्या 'कोकरे वस्ती'चा रस्ता श्रेयवादाच्या बळी!

शाळकरी मुलांचा जीवघेणा प्रवास; विकासकामांचा निधी दुसरीकडे वळवल्याचा ग्रामस्थांचा आरोप सत्यवेध न्यूज प्रतिनिधी~:दत्तात्रय यादव एकीकडे विकासाच्या मोठ्या गप्पा मारल्या जात असताना, दौंड तालुक्यातील बिरोबावाडी परिसरातील 'कोकरे वस्ती' मात्र मूलभूत सुविधांपासून वंचित आहे. गावातील २०० ते २५० मतदारांच्या आयुष्याशी खेळ मांडणाऱ्या येथील रस्त्याची अवस्था अत्यंत दयनीय झाली असून, श्रेयवादाच्या लढाईत हा रस्ता विकासाच्या प्रतिक्षेत खितपत पडला आहे. विशेष म्हणजे, शाळकरी मुलांचा हा प्रवास जीवघेणा ठरत असून, आता या भागातील संतप्त ग्रामस्थांनी आगामी निवडणुकीत मतदानावर बहिष्कार टाकण्याचा इशारा दिला आहे. रस्त्याची अवस्था की दलदल? मिळालेल्या माहितीनुसार, रस्त्याच्या सुरुवातीला काही अंतरापर्यंत डांबरीकरण करण्यात आले आहे, परंतु त्यानंतरची परिस्थिती अत्यंत बिकट आहे. पावसाळ्यात तर या रस्त्याचे रूपांतर चिखलमय दलदलीत होते. येथील शाळकरी मुले आणि मुलींना जीव मुठीत धरून शाळेत जावे लागते. चिखलामुळे पाय घसरून पडणे आणि अंगावर चिखल उडणे हे नित्याचे झाले आहे. रस्ता इतका खराब आहे की, येथून दुचाकीस्वार तर सोडाच, पण चालणेही कठीण झाले आहे. श्रेयवादाच्या राजकारणामुळे विकास खुंटला ग्रामस्थांच्या म्हणण्यानुसार, माजी आमदार रमेश थोरात यांनी एका वर्षापूर्वी या रस्त्याचे खडीकरण केले होते. मात्र, त्यानंतरचे काम पूर्ण करण्यासाठी प्रयत्न होणे गरजेचे होते. स्थानिक माजी सदस्य गावडे पाटील यांच्या माहितीनुसार, या रस्त्यासाठी निधी मंजूर झाला होता, परंतु स्थानिक राजकारण्यांच्या श्रेयवादाच्या लढाईमुळे मंजूर झालेला रस्ताही आजपर्यंत पूर्ण होऊ शकलेला नाही. निधी गेला कुठे? स्थानिक ग्रामस्थांनी ग्राम प्रशासन आणि ग्राम विकास अधिकाऱ्यांच्या कारभारावर गंभीर प्रश्नचिन्ह उपस्थित केले आहे. "आमच्या वस्तीसाठी मंजूर झालेला निधी नेमका कुठे वळवण्यात आला?" असा सवाल नागरिक करत आहेत. ग्राम विकास अधिकारी आणि सरपंच यांचे याकडे दुर्लक्ष होत असून, केवळ मतदानापुरताच आमचा विचार केला जातो, अशी भावना 'कोकरे वस्ती'करांनी व्यक्त केली आहे. "आम्ही फक्त मतदानासाठीच आहोत का?" लोकशाहीमध्ये मतदानाला अनन्यसाधारण महत्त्व असताना, त्या मतदानाचा हक्क बजावणाऱ्या नागरिकांनाच सुविधांपासून वंचित ठेवले जात आहे. "निवडणुकीच्या वेळी नेते आमच्या दारात येतात, आश्वासने देतात आणि निघून जातात. पण सत्तेत आल्यावर त्यांना आमच्या रस्त्याची आठवण राहत नाही," असे म्हणत संतप्त ग्रामस्थांनी आता प्रशासनाला इशारा दिला आहे. जर या रस्त्याचे तातडीने काम झाले नाही, तर मतदानावर बहिष्कार टाकण्याशिवाय आमच्याकडे पर्याय उरलेला नाही, असा पवित्रा ग्रामस्थांनी घेतला आहे. प्रशासनाचा आडमुठेपणा कधी संपणार? एकूणच, बिरोबावाडी ग्रामपंचायतीचा हा कारभार चव्हाट्यावर आला आहे. शाळकरी मुलांचे शिक्षण आणि ग्रामस्थांचे आरोग्य पणाला लावून चालवलेले हे राजकारण प्रशासनाला चांगलेच भोवू शकते. आता या प्रकरणावर वरिष्ठ अधिकारी दखल घेऊन कोकरे वस्तीच्या रस्त्याचा प्रश्न मार्गी लावणार का, हे पाहणे महत्त्वाचे ठरेल.